O BNG recupera a alcaldía de Fene tras lograr un pacto coas forzas de esquerdas

Despois de medio ano cunha situación de anormalidade democrática no concello de Fene, as forzas progresistas e de esquerdas fixeron valer a maioría absoluta que lles outorgaron os votos do pobo para pór fin a un goberno sen rumbo, sen proxecto e sen apoios dentro da súa propia organización.

Juventino Trigo volve ser o alcalde Fene grazas ao apoio dos seus seis concelleiros e concelleiras, de tres concelleiras do grupo socialista e da concelleira de Esquerda Unida. Con estas organizacións formarase nos vindeiros días un goberno de coalición e de entendemento co que se poderán realizar moitos proxectos ilusionantes para o Concello; o dito acordo será público no mesmo momento no que estea redactado.

Desde o BNG de Fene damos as grazas a toda a nosa militancia e simpatizantes polo apoio recibido durante todo este tempo. Como sempre, a nosa promesa é a de traballar arreo para que Fene funcione de novo e para que o noso concello volva ser o referente comarcal que ten sido durante décadas.